Lowlands-L is to allereerst ’n Forum fœr ’t Nafragen un fœr ’t Gäven un Kriegen vun Informatschonen in ’n fründlich un vermünnern Milljöö. De Spood vun düt Listenforum hangt ook in de Tokumst vun all de Liddmaten ähr Mitmaken un Mithelpen af. Abonnenten vun Lowlands-L schullen sik an de Rägeln un Richtlienen holden, de hier ünnen upnœmt sünd:
Menü: Benähmen Abonneren · Abbonnemang instellen · Liddmaatschupp upseggen · Liddmaatschupp wedder upnähmen · Abbonnemangs-Paus’ Biedrääg’ · Biedrääg’ na de List stüren · Biedrääg’ relevant holden · Thämen utenannerholden · Bi ’t Thäma blieven · Zitaten bedoon · Künnig maken, wokeen ’n ziteert · Sik bekannt gäven · Keen Bilagen schicken · Formateren · Keen knääpsche Purreree!
All de Biedrääg’ mööt hööflich un fründlich schräven sien;
Wat nich fœr de Ogen vun all de Liddmaten bestimmt is, dat schull privaat besnackt warrn, nich up de List, ’neem Hüün un Perdüün dat to läsen kriegt;
Abonnenten kœnt driest Publikatschonen, Software, Tagungen, Programmen or Stellen künnig maken, man dat kommerzielle Warven wardt nich tolaten;
Wat ’n bi ’t Ümfragen mang de Lowlands-L-Abonnenten to wäten kriggt, dat schull ’n achterran fœr all de Lowlands-L-Abonnenten tohoopfaten, un de Help, de ’n krägen hett, de schull ’n ok künnig maken;
Besünnere polietsche Saken kann ’n driest besnacken, wenn de direktemang wat mit Spraak un Kultuur to doon hebbt. Wenn se daar niks mit to doon hebbt, denn liggt so ’n Aard Diskereren butenvœr;
Bi de Kœr vun Spraken gifft dat bi Lowlands-L keen Rägeln, man düsse Spraken schull ’n d’n Vœrtog gäven: Afrikaans, Nedderlandsch, Seelandsch, Freessch (alle Varianten), Neddersassisch (Nedderdüütsch, Plattdüütsch), Limborgsch, Ingelsch un Schottsch.
Abbonnemang instellen Abbonnenten schullen in dat Ünnerwiesen vun Listserv® (http://www.lsoft.com/manuals/1.8d/userindex.html) rinkieken, wenn se wäten wüllt, wat fœr Abbonnemangs-Kœren dat gifft, un woans ’n se instellen kann. Befählen för ’t Instellen mutt ’n an de Adress listserv@listserv.linguistlist.org stüren. Üm besünnere Instellen (t.B. „digest“) kann ’n ook d’n ook d’n Verwalter (admin@lowlands-l.net bäden.
Liddmaatschupp upseggen Wenn ’n sien Liddmaatschupp upseggen will, denn mutt ’n ’n E-Mail mit de Wöörd’ „signoff lowlands-l“ na de Adress listserv@listserv.linguistlist.org stüren. Wenn ’n Abonnent sien Adress ännert hett un Gebruuk maken deit vun „e-mail forwarding“, denn erkennt de Server de neje Adress nich. In düsse Fall mutt de Abonnent an admin@lowlands-l.net schrieven un bäden, dat de olde Adress vun de List rünnerdaan wardt, un he mutt sien Naam un sien olde Adress angeven (dat is de Adress, vun de he toeerst abonneert harr). Staats düt to doon hebbt ’n paar Abonnenten vun „block sender“ Gebruuk maakt, dat Mails vun Lowlands-L bi jüm nich mehr ankamen kœnt. Sowat is grœver as groff! Denn kaamt bi d’n Verwalter hupenwies’ Fählermellen an, un he mutt ruutkriegen, wokeen dat is, de daar sien Adress ännert hett. De Naams vun düsse Lüüd’ wardt foorts up de Schietlist daan, un wenn se jüm ähr Abonnemangs later wedder upnähmen wüllt (wat al vœrkamen is) ... tja, de Anter, de se denn vun d’n Verwalter kriegt, de deit allens Annere as „Willkamen!“ bedüden.
Liddmaatschupp wedder upnehmen Dat is al faken vœrkamen, dat ehrmalige Liddmaten vun Lowlands-L wedder up de List upnahmen warrn wüllt. Wenn ’n wedder Liddmaat warrn will, denn mutt ’n an’n Verwalter schrieven un bäden wedder upnahmen to warden. Dat deit ’n liek so as bi’t eerste Maal: Antern up de Fragen vun de Homepage an Lowlands-L stüren.
Abonnemangs-Paus’ Abbonnenten kœnt mit „vacation mode“ Paus’ („vacation“ or „Urlaub“) maken, wenn se ’n Tiedlang niks vun Lowlands-L kriegen un liekers jüm ähr Liddmaatschupp nich upseggen wüllt. Denn mœt se d’n Befähl an listserv@listserv.linguistlist.org stüren or den Verwalter (admin@lowlands-l.net) daar üm bäden. Woans dat geiht, das steiht in ’t Ünnerwiesen (http://listserv.linguistlist.org/archives/lowlands-l.html).
Sendungen an die List Nur Abonnenten sind in der Lage an die Liste zu schreiben. Dieser Vorgang wird „überwacht“ („moderiert“); d.h. Einsendungen müssen bewilligt werden und erscheinen dann mit anderen Einsendungen zusammengefasst in nach Themen geordneten Ausgaben. Man schicke sie zur Gutachtung an lowlands-l@listserv.linguistlist.org.
Biedrääg’ na de List stüürn Biedrääg’ na de List stüren, dat kœnt man bloots de Liddmaten (d.h. Abbonnenten). Biedrääg’ kaamt up „rägelte“ Wies’ ünner de Lüüd’. Dat bedüüdt, dat Biedrääg’ nich automaatsch un direktemang bi all de Abonnenten ankaamt, wenn ’n jüm afschickt. Nee. Wat de Verwalter is (kunnst em ook „Redaktöör“ or „Moderator“ nœmen), de kiekt na, of de Biedrääg’ relevant un na d’n rechten Schick sünd, un denn deit he jüm bünnelwies’ in Uutgaven rin, in de se na Thämen sünnert an all de Liddmaten stüürt wardt. Abonnenten mœtt jüm ähr Biedrääg’ na de Adress lowlands-l@listserv.linguistlist.org stüren, wenn se wüllt, dat se bi all de Liddmaten ankaamt.
Biedrääg’ relevant holden Nie nich vergeten, dat ’t sik hier üm ’t „Leegland“ hannelt! „Leeglandsch“ hett nich dat sülvige Bedüden as „germaansch“. Nee. Wat Düütsch (d.h. „Hoochdüütsch“), Luxemborgsch un de noordgermaanschen Spraken (d.h. Skandinaavsch, Ieslandsch un Färöösch) sünd, de hebbt wi nich so richtig mit up de Tell in d’n Thämenkring „Leegland“. Liekers kann ’n düsse verwandten Spraken un Kulturen driest mit upnœmen, ook annere Spraken un Kulturen, besünners wenn ’n in d’n Thämenkring „Leegland“ wat daarvun aflehren kann. Man dat „Leegland“ schull daarbi nich uut de Künn kamen. Nee. Dat „Leegland“ is un blifft de Middelpunkt. Wenn ’n maal stootwies’ to’n Verklaren or Argumenteern vun wat Anners snackt, denn schull ’n amenn wedder na ’t „Leegland“ trüggkamen.
Thämen utenannerhooln Een enkelten Biedrag schull nich œver mehr as een Thäma sien. („Thäma“, „subject title“ un „subject line“ sünd dat Sülvige.) Düt deit ook denn gellen, wenn ’n up Berichten und Anfragen vun annere Liddmaten antert.
Bi ’t Thäma blieven Wenn ’n mit ’n neje Saak anfangt, denn dröff ’n driest sien egenen Thämatitel („subject title“) maken. Dat is denn man bloots ’n Vœrslag. Kann wäsen, dat de Verwalter em annimmt; kann ook wesen, dat he de neje Diskusschoon ’n annern Titel gifft. Wo allgemener ’n Titel is wo bäter is de Schangs, dat de Verwalter em annimmt; wenn nich, denn maakt he em allgemener. Wenn ’n ’n Reaktschoon up wat schrifft, wat al ünner ’n bestimmten Titel ruutkamen is, denn schull ’n bi düssen Titel blieven. Wenn, to d’n Biespill, de Titel „Language varieties“ („Spraakvarianten“) is, un ’n hett daar wat bitobottern, wat ’n anner Liddmaat œver Sülvstluden in flaamsche Dialekten schräven harr, denn schull ’n keen Titel so as „Long o and u in the dialects of Southern Flanders and speech habits of young Belgians“ („Lang o un u in de Dialekten vun Süüdflannern un de Spraakwennsten vun junge Belgiers“) bruken. Nee. Een schull bi d’n Titel (in düsse Fall „Language varieties“) blieven, ook denn, wenn ’n dat nich so recht to Pass kümmt. Wenn ’n bi d’n Titel blifft, denn kann de Verwalter de Biedrääg’ lichtfardiger sorteren. Wenn de Verwalter meent, dat Thema is ’n nejen Padd langsgahn, denn is dat sien egene Saak dat ’n nee Thäma to gäven.
Zitaten bedoon Wenn ’n up wat antern deit, wat ’n anner Liddmaat schräven hett, denn schull ’n nich bloots up’n Anter-Knoop klicken un gau wat vœr or achter ’n helen ziteerten Text tippen. Nee. Allens ruutsmieten, wat nich vun Belang is, tominnst den Kopp- un Foottext, de in elkeen Uutgaav’ vun Lowlands-L to finnen is! (Dat he mit daarbi is, dat hett sien Grünnen un steiht nich to Debatt.) Ook nich doon, wat de ene or annere af un an deit: Allens fein na de Rägeln doon, bit he niks mehr to schrieven hett, un denn d’n Rest vun d’n ziteerten Text achterranbummeln laten, un denn achterran de automaatsche „Ünnerschrift“.
Künnig maken, wokeen ’n ziteert Een dröff nich vergäten künnig to maken, wokeen dat west is, up den sien Biedrag ’n antert. (Wenn ’n man bloots up’n Anter-Knoop klickt, denn wardt sachs automaatsch „Lowlands-L“ as de Schriever vun d’n ziteerten Text angäven, nich dat Liddmaat, dat ’t schräven harr.)
Sik bekannt gäven Anonyme Biedrääg’ ward nich tolaten, un wenn ’n Liddmaat in eensen to anonyme Biedrääg’ inschickt, denn lett de Verwalter jüm ahn Waarschuun butenvœr. De Leserschupp mutt sehn kœnen, wokeen de Schriever vun ’n Biedrag is. Automaatsche „Ünnerschriften“ wardt tolaten, wenn se nich as Bilagen schickt ward. (Bilagen wardt nich tolaten!) Anners mutt de Schriever sien Naam blangen de E-Mail-Adress or an ’t Enn vun ’n Bidrag stahn. Vœrnaam un Nanaam bruukt nich partu blangen enanner stahn, so lang as se beid’ in een un den sülvigen Biedrag to finnen sünd.
Keen Bilagen schicken Bilagen (d.h. Dateien, „Ünnerschriften“ or Biller, de an E-Mails anhangt) wardt bi Lowlands-L nich tolaten. De Listserver smitt de mehrsten Aarden vun Bilagen al so ruut, un de Verwalter smitt de ruut, de noch nablievt. In’t Internet is dat is al so keen Aard un Wies’ Bilagen to schicken ahn vœrdem Verlööv daarfœr to kriegen, wieldat mit Bilagen besünnere Maleschen un Gefahren (t.B. „Viren“) verbunnen sien kœnt.
Formateren Ji mœtt daar an dinken, dat Biedrääg’ in eenfachen Text ümschräven wardt, un dat besünnere Klören un Formaten daar wägen nich bi de Liddmaten ankaamt. Un Ji schullen ook nich allens in Grootbookstaven schrieven.
Keen knääpsche Purreree! Wenn ’t klaar is, dat ’n Liddmaat mit Willen knääpsche Purreree drifft, denn wardt ’t ruutsmäten un wardt sien Läävdaag’ nich wedder upnahmen. Daar höört ook „Trolls“ mit to; dat sünd Minschen, de man bloots daar wägen Abbonnenten wardt, dat se mit Extremisten-Verschääl un annern dummerhaftigen Snack Undœgt un Unfräden („flame wars“) maken kœnt.
Bang bruukt ’n wiss nich wäsen, schull driest Biedrääg’ na Lowlands-L stüren, ook wenn ’t dat eerste Maal is. Wenn ’n as nüchtern Kalf wahrhaftig maal ’n groven Fähler maken deit, denn stöött de Verwalter em nett un still daar up an, dat he dat verbätern schull. D’n Fähler kriggt de Liddmaatschupp denn gaarnich to sehn, un maal de een or annere Fähler, de bruukt al so keen een schaneerlich wäsen. Wenn de Fähler nich so groff is, denn verbetert de Verwalter em een- or tweemaal in de Uutgaven mit ’t Hœpen, dat de Schriever Müüs’ markt un ’t bi ’t tokamene Maal akraat maakt.
Wenn ’n as nüchtern Kalv later geern maal wat biedragen will, denn schull ’n maal tokieken, wodennig dat de „olden Meesters“ doot, de „olden Basen“ or „Veteranen“ vun Lowlands-L, de Liddmaten, de al lang daarbi sünd (’n paar sogaar siet Anfang 1995!) un vun de faken Biedrääg’ to läsen sünd.
Na, denn maal goden Wind in de Seils! Wi hœgt us to Juun Sellschupp un Biedrääg’.
Home
