This page is in Stellingwerf Low Saxon.

Welkom bi’j Lowlands-L!

Lowlands-L is een automatiseerde e-mail lieste veur een internationaol pebliek van meensken mit belangstelling veur taelen en kulturen van de lege lanen bi’j de Noord- en Oostzee (hiernao: ‘Lege Lanen’). Lowlands-L wodt stuurd deur Listserv bi’j LINGUIST. De beheerder is Reinhard (Ron) Hahn.

Abonneren op Lowlands-L is ommenocht.

Lowlands-L hoolt him benaemens doende mit de Germaanse taelen en de kulturen die daor mit verbunnen binnen, zoas die heur ontwikkeld hebben in de Lege Lanen: Nederlaans, Zeeuws, Vlaoms, Fries, Nedersaksisch (Nederduuts)* en Limburgs. Veerder hoolt Lowlands-L him ok doende mit taelen en kulturen uut ere dielen van de wereld die mit al die eerder nuumde taelen een historische baand hebben (Afrikaans, Engels, Schots, de tael van laandverhuzers, pidgins en kreoletaelen die op zokke taelen weerommegaon). Ere taelen en kulturen meugen ok binnen dat verbaand anhaeld wodden.

* mit veur Nederlaand: Grunnings (in de perveensie Grunningen, heufdstad Grunningen), Drents (perveensie Drenthe, heufdstad Assen), Stellingwarfs (in de regio Stellingwarf, bestaonde uut de gemienten Oost- en West-Stellingwarf in et zuudoosten van de perveensie Frieslaand; heufdplakken Oosterwoolde/Wolvege), Overiessels (perveensie Overiessel: mit Twents in et oosten, Sallaans in de midden, West-Overiessels en ok Stellingwarfs in et noordwesten; heufdstad Zwolle), Aachterhoeks (in de perveensie Gelderlaand), Oost-Veluws (in de perveensie Gelderlaand; heufdstad Arnhem)

De belangriekste doelen van Lowlands-L

• et makkeliker maeken van kommenikaosie en saemenwarking tussen al degenen over de hiele wereld die aorighied hebben an de taelen en kulturen van de Lege Lanen;

• et veuruuthelpen en makkeliker maeken van onderzuuk naor tael en van onderwies in de taelen en kulturen van de Lege Lanen;

• et veuruuthelpen van et gebruuk van taelkundige en kulturele gegevens angaonde de Lege Lanen in meer algemien onderzuuk;

• et steunen van et doende wezen om de kleine taelen en taelvariaanten in de Lege Lanen te bescharmen, heur plak starker te maken en et gebruuk d’r van an te vieteren;

• et ommedaenken geven an kleinere taelen en kulturen in de Lege Lanen, de taelen en kulturen die niet officieel erkend binnen, inbegrepen;

• et dienen van een forum veur et zuken naor overienkomsten en verschillen tussen de taelen en kulturen van de Lege Lanen;

• et maeken van een meugelikhied om in verschillende, mar onderling wel begriepelike taelen tot een diskussie te kommen;

• et verstarken van de tael.

Regels veur gedrag en omgaank

• Alle bi’jdregen an Lowlands-L heuren netties, fesoenlik en vrundelik van aord te wezen;

• Lowlands-L is niet bedoeld veur persoonlike kommenikaosie. Die moet deur prive-kanalen zien gerak kriegen;

• Ankondigings van publikaosies, software, konfereensies, pergramme’s of vaketures meugen wel, mar kommerciele bi’jdregen wo’n butensleuten;

• Aj’ deur een algemiene vraogstelling op Lowlands-L gegevens opvraogen, woj’ verzocht d’r een saemenvatting van te maeken veur de ere abonnees, mit daor een anduding bi’j veur wie d’r op jow vraoge(n) bescheid geven het;

• Ie bin vri’j om een tael te kiezen veur bi’jdregen an Lowlands-L, mar et gebruuk van de volgende taelen wodt et liefst zien: Afrikaans, Nederlaans, Vlaoms, Fries (alle soorten), Nedersaksisch (alle soorten), Engels en Schots;

• Regels en richtlijnen (in het Nederlands)

• Disclaimer (in English)

Abonneren? Klik hier!

Translators: Henk Bloemhoff and Pieter Jonker